UPDATE—Ginpahayag ni Police Major Nelson Amsiwen Jr., hepe sang La Castellana Municipal Police Station, nga nagdangat na sa 46 ka tawo ang nagreklamo sa ila angut sa recruitment scam nga nagpasalig sa ila nga mangin miyembro sang Philippine National Police (PNP).
Suno kay Amsiwen, ginpahayag sang mga nagreklamo nga ginpasalig sila sang ginakabig nga mastermind sa nasambit nga scam nga si Mary June Delos Santos kag sa gina-alegar kaupod sini nga si La Castellana Sangguniang Bayan Member Donato “Natnat” Dumaguit nga makasulod sa PNP bisan indi na mag-agi sa husto nga proseso sa baylo sang P247,000 nga bayad kada isa.
Dugang pa ni Amsiwen, kalabanan sa mga aplikante amo ang residente sang La Castellana kag kalabanan man sa ila ang indi kwalipikado nga mangin pulis bangud ini amo ang mga overage, wala eligibility, kag undergraduate.
Nagdangat naman sa P15 Million ang nakuha nga kwarta ni Delos Santo gikan sa mga aplikante.
Pahayag pa ni Amsiwen nga kaso nga Estafa ukon Large Scale Estafa ang natalana nila nga ipasaka batuk kanday Delos Santos kag Dumaguit.*