Ginapatihan nga manughiwit ang isa ka mangunguma nga person with disability (PWD) nga ginluthang-patay kag ginlaslas pa ang puwak sa Purok Paglaum, Barangay Kumaliskis, Don Salvador Benedicto, Negros Occidental pasado las 4:00 kahapon sang kaagahon, Oktubre 4.
Ang biktima ginkilala kay Jolito Larigo y Tabay, pi-ang ang isa ka tiil, 54-anyos, bulag sa asawa kag may pito ka kabataan.
Base sa panaysayon sang mga pumuluyo sa lugar nga ginaalegar nga manughiwit ang biktima rason nga kun may magmasakit sa ila nga lugar, siya ang ginatudlo nga may kabangdanan.
Sa inisyal nga impormasyon nga nakuha sang Radyo Bandera sa anak sang biktima nga antes pa natabo ang krimen, may nagkadto nga tawo sa ila balay sadtong Setyembre 27 sang gab-i kag nagpangayo sang tubig apang wala nila ini ginsapak bangud gab-i na.
Apang, kahapon sang kaagahon, nakibot nalang ang magpamilya nga ginsulod ang ila balay sang mga armado nga kalalakinhan kag ginluthang gilayon si Jolito kag ginlaslas pa ang puwak sini.
Pahayag ni PMaj. Rey Tolosa, hepe sang Don Salvador Benedicto Municipal Police Station nga nakaangkon ang biktima sang igo sang bala sa iya nga ulo.
Dugang pa ni Tolosa nga may narekober sila nga duha ka basiyo sang bala sa ginluntaran sang insidente.
Padayon sa karon ang imbestigasyon sang kapulisan sa nagluntad nga krimen.*
