Pagatalakayon sang Regional Inter-Agency Task Force ang pangabay sang mga Local Chief Executives kag Gobernador sa Westen Visayas nga i-extend sang isa pa ka semana ang ginapatuman nga travel moratorium sa mga pasahero nga maga gikan sa National Capital Region nalakip diri ang Bulacan, Cavite, Laguna, Davao kag Cebu City bangud sa mataas nga kaso sang COVID-19 sa mga nahambitan nga lugar.
Ginsiling ni Cindy Ferrer, spokesperson sang RIATF nga mangin kaupod man sa karon sa virtual meeting si DILG Usec. Epimaco Densing matapos nga nagpadala sang sulat si Mayor Jerry Treñas sang Ilo-ilo sa National Inter Agency Task Force nga nagapangabay sang travel moratorium extension sang isa pa ka semana in-behalf sa bilog nga Region 6.
Ginapaathag man ni Ferrer nga indi sakop sang request ang mga Returning Overseas Filipino Workers kag Returning Overseas Filipinos bangud ila man nga gina konsiderar ang kagastohanan sang mga ini sa ila pagtinir sa Manila kag adlaw-adlaw may naga inabot nga mga ROF’s kag Returning OFW’s agud ma decongest didtp sa Metro Manila.
Suno pa sa kay Ferrer nga ila man gina konsiderar nga sa malawig na nga tinion nga naseparar ang mga ini sa ila pamilya kag nakatapos naman ang mga ini sa mandatory 14-day quarantine rason nga sila ang indi na pag-ilakip sa pangabay nga travel moratorium extension kag nakadepende na sa mga Local Government Unit kun ipang swab pa ang mga ROF’s kag ROFW’s sa ila tagsa ka lugar.
Samtang ang mga Returning Residents naman kag mga Authorized Persons Outside Residents nga nag gikan sa mga nahambitan nga mga lugar ang ginapangabay nga masakop sa travel moratorium.
Dugang pa ni Ferrer nga bangud sa naga saka nga kaso sang COVID-19 sa Western Visayas rason nga nag pangabay ang mga alkalde kag governors sang travel moratorium extension.
