May 18 ka mga panimalay ang posible i-evacuate kung mag-landslide sa bahin sang Sitio Manaol, Barangay Quintin Remo sa banwa sang Moises Padilla, Negros Occidental, kung diin may nakita nga paglitik sang duta.
“Bangod sang pag-inulan sa nagligad nga semana, nagadako ang litik sa lugar kag gadako ang posibilidad sang landslide kung magsige pa gid inulin,” suno sa page sang Moises Padilla LGU.
Ginpadulongan ni Mayor Ella Celestina Garcia-Yulo ang lugar kag gin-abisuhan ang mga pumuluyo nga magtinir anay sa balay sang ila mga paryente nga malayo sa nasambit nga “danger zone.”
“Ang mga wala masayluhan, pwede magtinir anay sa Evacuation Center sang banwa. Bilang dugang nga serbisyo sa mga pamilya, mahatag sang libre nga transportasyon pakadto pakari kung may mga importante nga kuluhaon sa ila mga panimalay,” suno sa Moises Padilla LGU.
Nagapati si Mayor Ella nga kinahanglan gid anay i-isolate ang lugar para sa safety sang mga pumuluyo.*
