BACOLOD CITY– Gin-aprubahan na sang Sangguniang Panlungsod (SP)-Bacolod pinaagi sa isa ka resolusyon ang paghingyo ni Bacolod City Mayor Albee Benitez nga magahatag sang otoridad para sa conformity sa proposed term loan facilities nga gin-aprubahan sang Development Bank of the Philippines sa kantidad nga P5.5 bilyones.
Sa ginpatigayon nga ika-39 nga regular session sang SP Bacolod, nahatag sang 11 ka mga konsehal sang Bacolod ang otoridad kay Mayor Benitez nga magpirma sa nasambit nga utang samtang sanday Councilors Renecito Novero kag Em Ang ang nag-abstain sa rason nga digital ang pirma sang Alkalde kag kakulang sang loan agreements ukon indi klaro ang terms sang DBP.
Sa pahayag ni Councilor Al Victor Espino, Chairman sang Committee on Laws, Ordinance and Good Governance, sa mga una nga proposal sang duha ka bangko naghatag ang Land Bank of the Philippines sang 4.25% nga interest rate fixed para sa tatlo ka tuig kag ang Development Bank of the Philippines nag-offer sang 3.75% fixed para sa duha ka tuig.
Dugang pa ni Councilor Espino, sadtong Lunes, Marso 27, nagpatigayon sang separado nga Committee Hearing kaupod si Councilor Jude Thaddeus Sayson, Chairman sang Committee on Appropriations and Finance nga sang aga nag-propose ang Landbank sang 3.70% fixed para sa tatlo ka tuig kag sang hapon gin-presentar sang DBP ang 3.55% per annum fixed para sa duha ka tuig.
Matapos ma-aprubahan ang resolusyon sa Sangguniang Panlungsod-Bacolod, ang City Treasurer’s Office karon ang magapasa sa Bureau of Local Government Finance (BLGF) agud makakuha sang certification may angut sa marangan nga hulamon sang Bacolod LGU.
Isa sa mga tinutuyo sang loan nga P5.5 bilyones sa statement ni Mayor Benitez amo ang Land Banking, Legislative Building, pagrenovate sang tatlo ka mayor nga merkado sa Bacolod, lima ka mini hospital sa lima ka Barangay sa Bacolod, pag-improve sang Old City Hall, pag-improve sang City Health Complex, Construction kag Improvement sang dalan, drainage system kag solar streetlights.*
