CALIFORNIA– Nabawian sang kabuhi si Eliyanah Crisostomo nga naga edad pa lamang sang lima ka tuig, matapos nga ginpaulanan sang bala ang salakyan sang pamilya Crisostomo sa Fremont , California sang Abril 8.
Suno sa mga nadakpan nga suspeks, nasal-an nila nga miyembro sang gang ang nagasakay sa SUV samtang nagabyahe ang mga biktima sa Interstate 880 Freeway.
Base sa panaysayon sang pamilya, hinali lamang nga gintuparan sang pula nga Honda accord ang ila SUV kag ginpaulanan sang bala samtang nagabyahe gikan sa birthday party.
Nagapungko ang lima ka tuig nga si Eliyanah sa likod sang salakyan kaupod ang iya manghod nga naga edad pa lamang sang onse ka bulan, sang nagluntad ang insidente.
Detenado na sa Alameda County Jail ang mga suspetsado nga sanday Humberto Anaya, Kristi Ayala Valderrama kag Emmanuel Sarango, nga lunsay miyembro sang Surenyo Gang.
