Sa nakuha nga impormasyon sang Radyo Bandera sa pamilya sang seaman sa isa ka Barangay sa banwa sang Pototan Iloilo, natinguhaan nga ma corner nila sa guwa sang mismo nga kwarto sang asawa sang seaman ang lalaki nga trabahador sang isa ka rosera ukon galingan sang palay nga nahamtang sa amo man nga Barangay.
Natabo ang pagkasapo sa masobra isa ka bulan na nga ginatago nga relasyon sang babaye kag sang trabahador sang gintalikdan nga semana sang manotaran sang pamilya nga masami lang nga naga taghol ang ila nga ido kung kaagahon.
Base sa pahayag ni alyas ‘Tiyoy’ utod sang seaman nga nabugtawan ini bangud sa gahod sang mga ido, sang nagsid-ing ini sa ila nga bentana may nakita ini nga landong sang tawo nga naga dalagan pakadto sa balay sang iya nga utod sa sulod sang ila nga compound, may nakita man ini nga tawo nga nagsulod sa kwarto sang asawa sang iya utod apang wala niya ini gin seryuso bangud wala niya ma klaruhan ang tawo nga iya nakita.
Pagkaaga gin hambalan ni Tiyoy ang asawa sang iya utod parte sa iya sini nga nakit-an sang kaagahon apang ginpawala ini sang babaye kag ginhambalan nga basi hubog lang ini.
Nahibaloan nga naglakat si Tiyoy sang aga kag sang hapon sa iya nga pagbalik nakabati ini sang istorya nga wala maka obra ang trabahador nga si alyas ‘Baby boy’ sa rosera suno man sa mga kaupdanan sini.
Sa maid-id nga pagpangusisa sang Radyo Bandera nahibaloan man nga si ‘Baby boy’ ang masami nga naga merienda kag naga inom-inom sa tyangge sang asawa sang seaman kag didto nag umpisa ang ila nga paghigugmaanay nga duha.
Sang nahibaloan ni Tiyoy nga nga wala naka obra si Baby boy, gintawag sini ang iya mga utod kag pamilya agud planuhan ang aktu nga pagdakup sa lalaki, ginpalab-ot nila ang kaagahon sang ginhusisa na sang mag-ululutod ang kwarto sang babaye kag didto na nakit-an si Baby boy sa likod sang pwertahan sang banyo.
Gilayon naman nga gintawag ang katapo sang Barangay kag mga kapulisan, suno pa sa pamilya nga daw kasubong sang eksena sa probinsyano ang natabo bangud madamu sang tawo sa palibot sang ila nga compound.
Dugang pa ni Tiyoy nga sang ginkapkapan na ang lalaki, nasal-an pa nga armas sang mga pulis ang iya sini nga kinatawo.
Gilayon naman nga gindala sa Pototan PNP ang duha, pagkaaga daw kasubong sang isa ka ‘love story’ pa ang natabo bangud nga sang ginbuy-an na ang mga ini nag “I love you” pa ang babaye kay Baby boy kag ginaalegar nga naghambal pa ini sang mga tinaga nga “Aanhin mo ang pera kung wala ka namang katabi.”
Nahibalaon nga si Baby boy ang tumandok sang Palawan apang may pamilya ini sa Negros Occidental.
Sa karon wala pa ginpabalo ang bana sang babaye tungod sa kakulba sang pamilya nga basi indi masarangan sini ang natabo.
Samtang babaye ang ginbalik naman sang pamilya sang seaman sa iya sini nga pamilya.
