Mainit nga gin-abi-abi sa probinsya sang Negros Occidental si Senatorial Candidate Gilbert ‘Gibo’ Teodoro.
Una sini nga ginpadulungan ang siudad sang Bago sa diin nakighinun-anon ini sa masobra isa ka gatos nga mga punong barangay nga nasakpan sang 4th district sang Negros Occidental, pila ka mga alkalde, board members, subong man sanday Vice Governor Jeffrey Ferrer kag asawa sini nga si Congresswoman Juliet Ferrer kag si Governor Eugenio Jose ‘Bong’ Lacson sa Bago City Coliseum.
Sa speech ni Gov. Lacson, naghingyo ini sa mga kapitan nga nagtambong nga botohon kag suportahan si senatorial candidate Gibo Teodoro imbes nga mga artista nga senador ang ibutang sa puwesto.
Nagapati naman ang gobernador nga nagakabagay nga ibutang sa senado si Teodoro bangud sa kapasidad sini kag mga plano nga makabenepisyo ang kadam-an.
Gintib-ong man ni Vice Governor Ferrer si Teodoro bilang senador sa palaabuton nga eleksyon.*
by Jinn Siatita
