Isa ka provincial vehicle ang gin-clamp sa parking area sang Philippine National Bank (PNB) bangud sa paglapas sini sa parking rules and regulations sa lugar.
Suno sa building engineer nga si Rod Magdaluyo nga nagpadala sila sang notice sa Kapitolyo Probinsyal sang nagligad nga Marso kun sa diin magahatag sila sang multa nga P1,000 sa magalapas sa parking rules sang PNB.
Ini ang bangud 80 lamang ka mga salakyan ang masarangan nga ma-akomodar sang lugar nalakip na ang mga empleyado sang bangko kag pribado nga mga kliyente.
Dugang pa ni Magdaluyo nga isa sa mga rason sang strikto nga pagpatuman sang parking rules and regulations amo ang malawig nga pagpark sang salakyan sa PNB.
Suno pa kay Magdaluyo nga naghatag sang kopya ang Kapitolyo Probinsyal sa mga authorized nga mga salakyan sa probinsya nga pwede maka-park sa lugar kag wala diri nalakip ang mga private service vehicle sang mga empleyado.
Ginkumpirmar sang Admin sang PNB nga 80 lamang ang parking spaces sa lugar kag kun wala sang organisado nga parkingan, magasinamo ang salakyan nga paga-awayan sang kliyente kag empleyado sang kapitolyo bangud kun may ma-damage sa salakyan, sila ang pagasukton.
Kahapon sang hapon, nagsapol ang opisyales sang GSO sang probinsya kag admin sang PNB kag ila ginkasugtan nga ini ang magaserbe nga warning sa mga empleyado sang probinsya nga mag-park sa insakto nga lugar agud malikawan nga ma-clamp.
Gintinguhaan sang Radyo Bandera Bacolod nga kuhaan sang pahayag ang tagpamuno sang GSO sang probinsya apang ini ang may yara pa sang importante nga meeting sa kapitolyo.*
