Ginalantaw sang Bago City Police Station nga pagtimalos ang motibo sa pagluthang-patay sa isa ka traysikol driver sa Purok Yellowbell, Brgy. Binubuhan, siudad sang Bago takna las 7:00 sang aga, Lunes, Oktubre 16, 2023.
Ang biktima ginkilala kay Joey Mallo y Sarabia, residente sang Barangay Binubuhan sa nasambit nga siudad samtang ang suspek amo si Francis Dalisay y Ramos, kag residente man sang nasambit nga siudad.
Sa interview sang Radyo Bandera kay Police Lieutenant Colonel Jay Malong, hepe sang Bago City PNP, tinalikdan nga bulan may yara sang report sa police station nga nagtapungulay ang biktima kag ang suspek nga isa ka anay CAFGU.
Suno kay Malong, bangud nga dako sang panglawason si Mallo napierde sini si Dalisay nga amo ang ila ginalantaw kun ngaa nagbalos ini sa biktima.
Ginapahayag nga away sa parkingan sa ila TODA terminal ang ginhalin sang ila nga away.
Base sa imbestigasyon sang kapulisan, kahapon sang aga nakit-an mismo sang witness nga ginpark sang biktima ang iya nga traysikol sa kilid sang dalan kag nagahulat ini sang pasahero, sang nag-abot man ang suspek kag ginpark man ang iya motorsiklo.
Sang ulihi nakita na lamang sila sang saksi nga nagabaisay kag makaligad ang pila ka minutos nabatian na lamang ang apat ka lupok kag ang singgit sang biktima nga “Tabang!”
Si Mallo ang nakaangkon sang apat ka gunshot wound sa iya nga dughan.
Sa follow up operation sang kapulisan, ginturn-over sa ila ang armas luthang nga gingamit sang suspek.
Sa karon nagapadayon ang manhunt operation batok kay Dalisay nga nagapabilin nga atlarge.*
