Nagapangatubang sa isa ka kaso ang 41-anyos nga lalaki sa pungsod Netherlands matapos madiskubrihan nga siya ang amay sang masobra 500 ka mga bata paagi sang pagdonar sang iya sperm ukon semilya sa nagkalain-lain nga clinic.
Sa report sang ABC News, nagpasaka sang reklamo ang isa sa mga iloy sang iya anak sa nasambit nga pungsod agud pagbawalan si Jonathan nga magdonar liwat sang semilya.
Nahibaluan nga na-ban na sa pagdonar sang semilya si Jonathan sadtong 2017 matapos ini mangin amay sang 102 ka mga bata gikan sa 11 ka clinics paagi sang Dutch Society of Obstetrics and Gynecology, apang padayon ini sa gihapon sa paghatag sang iya sperm sa iban nga fertility clinics.
Nakasaad sa Dutch medical guidelines, tubtob 25 ka mga bata lamang ang pwede nga maghalin sa isa ka amay agud malikawan ang incest kag psychological problems.
Suno sa Donorkind Foundation nga isa ka organisasyon nga nagabulig sa mga bata nga ginbun-ag paagi sang sperm donation nga nagapangita sang ila amay,
nakabaton sila sa sang madamo nga tawag sang mga iloy nga nagakabalaka nga basi naghalin sa isa lamang ka donor ang ila mga anak.
Nahibaluan nga ang ginabayran ang mga sperm donors sa pungsod Netherlands sang $10 (P544) tubtob $20 (P1,089) sa kada donasyon.*
