Indi na ma-contact sang iya nga himata ang Filipino caregiver nga nagtambong sa nova music festival nga ginhiwat sa Rahi, Israel matapos nga gin-atake sang militante nga grupo nga Hamas ang venue sang selebrasyon.
Ang caregiver ang ginkilala kay Loreta Alecra, 49-anyos, residente sang Sitio Camay-an, Barangay Cadiz Viejo sa siudad sang Cadiz, ika-anom sa walo ka mag-ulutod sang pamilya Alecra, dalaga kag wala sang bata, kag duha na ka dekada nga nagatrabaho sa Israel.
Halos 12 na ka tuig nga nagatrabaho bilang caregiver sa Haife si Loreta kun sa diin isa ka tigulang ang ginatatap sini. Matapos magtaliwan ang tigulang nga ginatatap, nagsaylo ini sa Tel Aviv sa proper sang Israel agud tatapon naman ang na-aksidente nga apo sang tigulang nga napatay.
Suno sa utod ni Loreta nga si Anabella Alecra, ginsaysay sa ila sang isa sa mga abyan ni Loreta nga naga-obra man sa Israel nga nagkadto sa iya ang ila utod bangud nagbayad ini sang aritos nga iya ginbakal para sa iya mga hinablos.
Wala naman nagdugay ang ila nga istoryahanay bangud nagpadulong pa si Loreta sa salon agud magpa-manicure bangud magatambong ini sa isa ka music festival.
Suno pa kay Anabella nga na-contact pa nila si Loreta sang Biyernes sang gab-i, Oktubre 6 apang sang Sabado sang gab-i, Oktubre 7 wala na nakapabatyag si Loreta rason nga gintinguhaan nila nga kontakon ini apang indi ma-reach ang iya messenger kag mismo ang numero sang iya nga cellphone.
Didto na nila nahibaluan ang makasilidhi nga pagpang-atake sang militante nga grupo nga Hamas sa boundary sang Gaza kag Israel.
Apisar sang mga natabo kag alegasyon sang mga abyan ni Loreta sa Israel nga ini ang gin-abduct sang mga Hamas, nagapati ang pamilya nga yara ini sa maayo nga kondisyon bangud wala naman sang saksi kag nakapamatuod nga gin-abduct ini sang militante nga grupo.
Madumduman takna las 7:00 sang aga sang Sabado, gin-atake sang Hamas ang venue sang Nova Music Festival kun sa diin kapin 250 ka mga tawo ang ginpamatay.
Bangud sa kadamuon sang Hamas, nakasulod ini sa boundary sang Gaza kag Israel rason nga nagdalagan sa open field, nagpanago sa kagulangan kag nagpalagyo sakay sang ila salakyan ang mga tawo apang na-intercept sila sa gihapon sang militante nga grupo.
Nagapangayo sang bulig sa gobyerno ang pamilya ni Loreta agud makit-an na ang ila nga himata nga na-missing sa Israel.*
