LA CARLOTA CITY – Patay ang isa ka drayber samtang pilason naman ang mga pasahero nga nalakipan sang mga menor-de-edad matapos naglapaw ang isa ka traysikol sa kampo sa National Highway, Brgy. Cubay, sa siudad sang La Carlota las 5:00 sang hapon sang Lunes, Nobyembre 14.
Ginkilala ang nagtaliwan nga drayber nga si Freddie Rivera, 63-anyos, may asawa, kag residente sang Sitio Kaingalan, Brgy. La Granja, sa nasambit nga siudad.
Base sa report sang La Carlota City Police Station, nadulaan sang kontrol ang drayber nga nagresulta sa paglapaw sa kampo kag pagtakilid sang motorsiklo.
Nakaangkon ang drayber kag mga estudyante sang mga pilas sa nagkalain-lain nga bahin sang lawas.
Nalakip sa mga pasahero ang apat ka 16-anyos, duha ka 17-anyos, isa ka -19 anyos; lunsay mga estudyante kag residente sang nasambit nga siudad, kag isa ka wala pa makilala nga persona.
Gindala ang mga biktima sa ospital apang ginbawian sang kabuhi ang drayber.
Yara naman ang traysikol sa La Carlota CPS para sa nagakaigo nga disposisyon.
