Pilason ang isa ka drayber matapos nga makabunggo ang ginamaneho nga tricycle sa abiryado nga truck sang tubo sa Sitio Dinandan, Brgy. Anahaw, Hinigaran, takna las-syete sini nga gab-i, Agosto 21.
Ginkilala ang biktima kay Nesty Miles Peñafel, yara sa legal nga pang-edaron kag residente sang Purok Carmen, Brgy. Miranda, Pontevedra, Negros Occidental.
Samtang ang driver naman sang 14-wheeler truck nga si Marsilo Castro, 35-anyos kag residente sang Brgy. Kumaliskis, banwa sang Don Salvador Benedicto ang yara karon sa kustodiya sang Hinigaran Municipal Police Station.
Suno sa inisyal nga imbestigasyon sang Hinigaran Police, naga-padulong ang biktima sa norte nga bahin sang highway kag hinali nalang ini nga nakabunggo sa naga parking nga na-aberya nga 14-wheeler truck.
Suno sa mga nakakita, madasig ang dalagan sang tricycle kag gina-alegar yara sa impluwensya sang makahulubog nga ilimnon ang biktima rason nga wala niya nakontrol ang iya ginadala nga tricycle.
Naka-agom sang pilas sa ulo si Peñafel.
Gilayon naman nga gindala ang biktima sa Hinigaran Medical Clinic.
Kargado sang tubo ang 14-wheeler truck kag nakita nga may ginbutang man ini nga early warning device.
Nahibaluan nga nagsugod na bukas ang galing sang mga central sa Negros Occidental gani nagapanugyan ang utoridad sa mga motorista nga mag-doble halong sa dalanun.*
