BACOLOD CITY – Nangin “smooth” kag wala sang narekord nga mga insidente sa una nga adlaw sang pagpatuman sang full face-to-face classes sa siudad, suno kay Lila Vaflor-Arro, Information Officer sang Department of Education (DepEd) Bacolod.
Apang nagaguwa nga may kakulang sa “critical resources” sa mga buluthuan kaangay sang classrooms, manunudlo, kag mga bangko para sa mga estudyante.
Dugang pa ni Vaflor-Arro, ini ang problema sang DepEd kada tuig.
May mga buluthuan nga nagahingyo sang dugang nga ‘furniture’ lakip ang Barangay Singcang-Airport National High School kag Fr. Gratian Murray, AFSC Integrated School kag aprubado na ini sang lokal nga panguluhan sang siudad.
Base sa inventory sang DepEd Bacolod, kulang ang mga buluthuan sang 16,260 ka mga bangko nga ginatinguhaan na sang local government unit (LGU) sang siudad kag ginalauman nga magaabot sa masunod nga mga binulan.
Dugang pa, may 17 ka mga buluthuan nga kinahanglan makay-o kun diin P78 million nga budget ang kinahanglanon.
Nanagtag naman sang school supplies ang LGU sa pagpanguna ni Councilor Al Victor Espino, chairman sang Committee on Education, para sa mga estudyante sang Huwebes sang hapon, Nobyembre 3.
