Ginkumpirmar sang hepe sang Police Station 8 nga si Police Major Puerto nga may kaangtangan sa druga ang motibo sa pagluthang-patay kay Jerry Gasendo sa dalan Araneta, Purok Maninihon, Barangay Tangub sang Miyerkules, Nobyembre 2, 2022.
Suno kay Puerto, konektado si Gasendo sa isa ka streetsweeper nga nakuhaan sang P680,000 nga balor sang ginasuspetsuhan shabu sa ginpatigayon nga buy-bust operation sa Sharina Heights, Barangay Taculing sadtong Oktubre 27.
Nahibaluan nga ginapanag-iyahan ni Gasendo ang shabu nga nakuha kay Mary Nessa Ong alyas “Tata”, 40-anyos kag gindugang pa ni Puerto nga yara si Gasendo sa Drug Watchlist sa Barangay 40.
Sandig sa imbestigasyon sang Police Station 8, takna las 12 sang udto nagdeliver si Gasendo sang isa ka order sang palabok sa Barangay Pahanocoy kag sang pabalik na ini sa iya puluy-an sa Barangay 40, gilayon na lang ini nga ginluthang sang riding-in-tandem suspects.
Bangud diri, ginpahayag ni Puerto nga ila ginapatihan nga ginasundan na sang mga supetsado si Gasendo bangud kabalo sila sang oras kag diin maga-agi ang biktima.
May yara naman sila sang person of interest sa pagluthang-patay kay Gasendo apang padayon sa gihapon ang ila nga imbestigasyon agud mahibaluan kag matumod ang mga suspetsado.
via Kabanderang Jinn Siatita
