Friday, October 7, 2022

US KAG CANADA, GINKONDENAR SANG CHINA SA PAGPADALA SANG WARSHIPS SA TAIWAN STRAIT

- Advertisement -

Ginkondenar sang Chinese military ang Estados Unidos kag Canada bangud sa pagpadala sang warships sa Taiwan Strait sadtong nakaligad nga semana nga ginapatihan pagpamahog sa katawhayan kag kabakod sa rehiyon.

Ang Taiwan ang gina-angkon nga teritoryo sang China kung sa diin, nakaligad nga tuig, sulit-sulit ini nga nagapatiayon sang air force mission sa air defense identification zone (ADIZ) sang nasambit nga pungsod.

Umpisa Oktobre 1, yara sa 159 nga aircraft ang ginpadala sang China sa zone sa sulod sang apat ka adlaw nga nagpasaka sang tensyon sa tunga sang Beijing kag Taipei nga nagtuga sang pagkabalaka sa bilog nga kalibutan.

- Advertisement -

Suno sa US military, naglayag sa makitid nga alagyan sang tubig nga nagaseparar sa Taiwan kag China ang Arleigh Burke-class guided missile destroyer nga USS Dewey kaupod ang Canadian frigate HMCS Winnipeg sadtong Huwebes kag Biyernes.

Na-monitor naman ini sang Eastern Theatre Command sang People’s Liberation Army sang China kag hugot nga ginabantayan ang paglabay sang mga barko.

“The United States and Canada colluded to provoke and stir up trouble… seriously jeopardizing peace and stability of the Taiwan Strait,” pahayag sang Chinese military.

Nahibaluan nga kada bulan naga-agi sa Taiwan strait ang US Navy, nga bangud man sa kaakig sang Beijing, gina-akusaran sini ang Washington sang paghimok sang tensyon sa rehiyon.

Magluwas sa US, kung kis-a, nagapadala man sang barko sa nasambit nga strait ang mga kaalyado sini ng pungsod kaangay sang Britain.

Sa piyak sang nagataas nga tensyon, wala naman sang nagluntad nga pagtiniruhay samtang wala nagasulod sa Taiwanese air space ang Chinese aircraft kag nakatutok lang sa ila aktibidad sa southwestern part sang ADIZ.

Samtang, suno sa defense ministry sang Taiwan, talto ka Chinese aircraft ang liwat nga naglupad sa ADIZ.

- Advertisement -
Coolen Cubia
Coolen Cubia
A newscaster and news writer in one of the Local Radio FM Stations in Negros Occidental. Graduated in University of Negros Occidental-Recoletos Bachelor of Science in Mass Communication.

Related Articles

Leave a Reply

Stay Connected

- Advertisement -

Latest Articles