Ginalantaw sang kapulisan nga motibo ang wala nabayran nga utang sa pagluthang-patay sa isa ka pedicab driver sa Hda Euzkara, Barangay Palampas, siudad sang San Carlos, Negros Occidental, takna las 6:30 sang aga, Lunes, Nobyembre 6.
Ginkilala ang biktima kay Ronald Santillan Y Alqueza, 39-anyos, may live-in partner kag residente sang Phase 4, Fatima Village, Barangay Rizal sa nasambit nga siudad.
Suno kay Pmaj Ryan Villasario, Deputy Chief of Police sang San Carlos City Police Station nga ila ginalantaw nga motibo sa krimen ang wala nabayran nga utang sang biktima sa suspek.
Dugang pa ni Villasario nga padayon sa karon ang ila ginapatigayon nga imbestigasyon agud madakpan na ang suspek nga nagpalagyo matapos ang krimen.
Madumduman nga ginsaysay sang live-in partner sang biktima nga si May Gonzaga Y Castillo, 27-anyos nga nagapahuway sila ni Santillan sang makadali sa nasambit nga lugar.
Sang makaligad ang pila ka minutos, nakita ni Gonzaga nga nagguwa sa tanuman sang tubo si alyas Jeproks nga nakasuksok sang itom nga jacket kag itom nga dilargo.
Hinali na lamang ginluthang ni alyas Jeproks si Santillan kag nagpalagyo matapos ang krimen.
Gindala naman si Santillan sa San Carlos City Hospital agud mahatagan sang medikal nga atensyon apang gindeklarar ini nga dead-on-arrival sang attending physician.
Narekober naman ang isa ka basiyo sang bala sang armas-luthang nga calibre 45 sa ginluntaran sang insidente.
Desidido naman ang live-in partner sang biktima nga magpasaka sang kaso nga murder batuk sa suspek.*
