Wala sang nagkalamatay, apang 16 ang nasamaran sa magnitude 6 nga linog sa Davao De Oro

Nagpagwa na sang datus ang National Disaster Risk Reduction and Management Council okon NDRRMC angut sa mga nahalitan sang linog sa Davao de Oro.

Base sa record sang ahensya, may 16 ka mga persona nga nasamaran sa mabaskog nga pagtay-og sa lugar.

Nakaangkon man sang damage ang 52 ka mga struktura sa lugar kalakip na diri ang apat ka mga puluy-an.

Matapos ang magnitude 6 nga linog, ginsundan pa gid ini sang 383 ka mga pagtay-og okon aftershocks nga may kabaskugon nga 1.3 tubtub 3.6 magnitude.

Nagluntad ang magnitude 6 nga linog sa banwa sang New Bataan sa probinsya sang Davao de Oro, miyerkules sang gab-i, base sa record sang Philippine Institute of Volcanology and Seismology (Phivolcs).*