BACOLOD CITY – Luwas sang ila kaanyag, ginpasundayag man sang mga kandidata sang Lin-ay sang Tablas 2023 ang ila kaalam sa ila pagbisita sa programa nga 11MBPS sang Radyo Bandera Sweet FM Bacolod sini nga Biyernes, Pebrero 3.
Ginpapili ni Kabanderang Jean Paul Generoso ang mga kandidata sa mga konsepto kaangay sang “love, beauty, dream, kag success” kun diin naghatag ang mga kandidata sang ila tagsa ka opinyon angut sa ila nagabutan nga konsepto.
Sa siyam ka mga kandidata, isa lamang ang pagakoronahan bilang Lin-ay sang Tablas 2023 sa pagahiwaton nga Pageant Night sa banwa sang Candoni sa Pebrero 10 las syete sang gab-i.
Magahatag naman sang corporate awards ang Radyo Bandera kag Clinica de Alternativo Medicina & Wellness Center, Inc. sa pagpanguna sang CEO nga si Doc Ramel Uy.
Nalakip sa igahatag nga corporate awards ang Miss Clinica D3 Bio, Miss DTX 500, Miss Mighty Cee, kag Radyo Bandera People’s Choice Award kun diin makabaton ang mapilian nga mga kandidata sang mga produkto sang Clinica kag cash prizes.
Kabahin ang Lin-ay sang Tablas sa pagsaulog sang Dinagyaw Festival sang Candoni.
