Patay ang isa ka zumba instructor matapos ginluthang sa ulo sa guwa sang isa ka hypermart sa dalan Burgos, Brgy. IV, sa banwa sang Hinigaran takna las otso sang aga sang Huwebes, Agosto 18.
Ginkilala ang biktima nga si Clint James Tomazar, yara sa legal nga pang-edaron kag residente sang Brgy. Naruis sa nasambit nga banwa.
Base sa inisyal nga impormasyon nga natipon sang kapulisan, ginsundan ang biktima sa hypermart sang wala pa makilala nga lalaki nga nakasakay sa motorsiklo nga Yamaha Mio 125 FI nga nagaduag sang dark blue antes ini ginpalapitan kag ginluthang sa ulo.
Gindala pa ang biktima sa Hinigaran Medical Clinic kun diin ini gindeklarar nga patay.
Indi pa matumod sang kapulisan ang rason sa pagpangluthang samtang nagapadayon ang hot pursuit operation agud madakpan ang suspek.
Nahibaluan nga nagasuksok ang suspek sang baseball cap (dark-colored), t-shirt nga nagaduag sang puti nga may stripes, kag tactical pants nga nagaduag sang brown kag may pito ka mga bulsa.
