BACOLOD CITY – Nakuhaan sang ginasuspetsuhan shabu ang isa ka 20-anyos nga lalaki sa ginpatigayon nga buy-bust operation sa Purok Sigay, Barangay 2, siudad sang Bacolod takna las-8:30 sang gab-i sang Sabado, Agosto 12, 2023.
Ginkilala ang suspetsado sa kay Arturo Peñosa, 20-anyos nga residente sang nasambit nga lugar, soltero, wala sang trabaho, kag ginakabig nga high value individual (HVI) sang kapulisan.
Base sa inisyal nga impormasyon, ginabulubanta nagabug-at sang 15 ka gramos kag nagabalor sang P127,500 ang ginasuspetsuhan shabu nga nakuha sa suspek.
Suno kay Police Captain Paul Vincent Pendon, hepe sang Bacolod City Police Station 2, nadakpan na anay sang tuig 2020 ang 20-anyos sa kaso nga paglapas sa Section 5 sang Republic Act 9165 ukon ang “Comprehensive Dangerous Drugs Act.”
Nagapang-atubang subong ang suspek sang kaso bangud sa paglapas liwat sa nasambit nga layi.
Dugang pa ni PCAPT Pendon, napriso man ang amay kag 24-anyos nga magulang sang suspek bangud man sa paglapas sa Sections 5 kag 11 sang RA 9165.
