BACOLOD CITY – Gin-alegar nakuhaan sang isa ka sachet sang ginasuspetsuhan shabu kag improvised tooter ang 21-anyos nga lalaki nga nadakpan bangud sang pagpangawat sang cable, battery kag krone terminal sang PLDT sa corner Raymund Street, Barangay Singcang-Airport sa syudad sang Bacolod, takna la 1:20 sini nga hapon, Martes, Setyembre 20, 2022.
Ginkilala ang suspek kay Joel Reunir, 21-anyos, kag residente sang Purok Rosal, Barangay Singcang-Airport.
Nagpadulong sa Police Station 8 ang operation security officer sang PLDT Company agud i-report nga pwersa nga ginbuksan ang ila PLDT Cabinet nga yara sa corner Raymund Street.
Ginkuha sang mga suspek ang apat ka mga battery nga may logo sang PLDT, duha ka sets sang Krone terminal kag PLDT cable wire.
Nagpatigayon sang ocular kag follow-up investigation ang mga operatiba kag tigayon nga na-identify ang mga suspek nga sanday Reunir, kag duha pa gid ka mga persona nga ginkilala lang sa mga alyas nga “Boyboy Ticar,” residente sang Purok Cadena De Amor sa Barangay Singcang-Airport kag “Negro” nga taga Barangay Handumanan, Bacolod.
Na-aresto si Reunir kag nakuha sa iya ang duha ka sets sang Krone Terminal kag duha ka battery sang PLDT.
Gin-alegar nakuha man kay Reunir ang isa ka brown nga coin purse, isa ka elongated heat-sealed transparent plastic sachet nga may unod nga suspected shabu kag isa ka improvised tooter.
Suno kay Reunir nakapalagyo ang duha niya ka mga upod kag gin-ako man sini nga nagagamit siya sang iligal nga droga.
Suno kay P/Maj. Joery Puerto, hepe sang Bacolod Station 8, sang ginpa-check nila ang records ni Reunir, madamo ang reklamo batuk sa iya, nalakip na ang pagkastigo sin isa iya PWD nga utod kag pagpamahog nga patyon niya ang iya nga amay.
Base sa impormasyon nga nabaton sang kapulisan, gin-alegar “addict” sa iligal nga droga si Reunir, nga nakaagi man pangastigo sang pangayaw nga taga Silay City, suno pa kay Puerto.
Magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002 si Reunir, magluwas pa ini sa kaso nga igapasaka sang PLDT batuk sa iya.*
