Pilason ang isa ka laborer matapos ini ginbuno sang iya kaingod balay sa Barangay Lalagsan, sa banwa sang La Castellana, Negros Occidental, takna las 12 sang udto sini nga Lunes, Nobyembre 28.
Ginkilala ang biktima kay Eugene Francisco, 25-anyos, may asawa samtang ginkilala naman ang suspek kay Edzel Dulana, 47-anyos, may asawa; lunsay mga residente sang nasambit nga lugar.
Suno sa imbestigasyon, utdon na kuntani sang suspek ang puno sang iya kaingod balay gamit ang chainsaw sang hinali nag-abot ang biktima kag naghambal nga, “ari ka di nag hambal nagid ko nga kng Makita t ak pahumokon ko ulo mo.”
Matapos sini, ginhampak sang biktima gamit ang bato ang nawala nga bukton sang suspek.
Wala pa nakuntento ang biktima bangud ginsumbag kag ginlampusan pa sini sang bato ang ulo sang suspek.
Bangud diri, ginpaguwa sang suspek ang iya patalom kag ginbuno ang nawala nga dughan sang biktima.
Gilayon naman nga gindala ang biktima sa ospital apang nadakpan naman ang suspek kag gindala man sa kapareho nga ospital agud mahatagan sila sang medikal nga atensyon
Suno sa La Castellana MPS, daan nga hiligut-anon ang ila ginalantaw nga motibo sang suspek sa pagpangbuno sa biktima.
