Yara sa 3,000 nga “high level” cyberattacks ang narecord sa Pilipinas humalin 2020 tubtob 2022, suno sa Department of Information and Communications Technology (DICT).
Sa report sang GMA, ginpahayag ni DICT Assistant Secretary Jeffrey Ian Dy nga halos katunga sang nasambit nga pag-atake amo ang systems kag networks sang mga gobyerno kag emergency response teams.
Sandig sa datos sa nasambit nga petsa, may na-monitor man ang DICT sang 54,000 cyber threats kag lima na ka mga government agencies ang gin-atake humalin Enero 2023.
Dugang pa sini, may yara lamang sang 300 ka mga certified information security systems professionals sa Pilipinas bangud kalabanan sa mga ini ang naga-obra sa iban nga pungsod sa rason nga mas mataas ang sweldo.
Bangud diri, yara sa ika-apat nga puwesto ang Pilipinas sa may pinakamadamo nga cyberattacks sa bug-os nga kalibutan.
Agud mangin maalam ang mga kabataan angut sa hacking kag makahibalo kun paano ini mapamatukan, nagpatigayon ang DICT sang contest nga “Hack For Gov”.
Sa sulod sang duha ka adlaw, maga-compete ang mga estudyante gikan sa 20 ka mga eskwelahan sa Metro Manila.
Ang magadaug sa nasambit nga kompetisyon ang maga-compete sa Regional Level kag ang magadaug diri ang maga-compete naman sa International Contest.
Isa ka madako nga bulig batuk sa cybercrime ang SIM registration bangud mas mahapos matumod ang mga scammer, apang 37% pa lamang ang narehistro nga SIM card apisar nga sa Abril 26 na ang deadline sini.
Suno pa kay Dy nga ginatalakay na karon sang DICT ang posible nga extension sa deadline sang SIM registration.*
