Agud ipakita ang importansia sang creative industry sang Pilipinas, pagabuksan ni Presidente Ferdinand “Marcos” Jr. ang Malakanyang agud ipakita ang mga talento sang nagkalain-lain nga local performing artists.
Suno sa Presidential Communications Office (PCO), igalunsar ang pinakauna nga “Konsiyerto sa Palasyo” sa Abril 22, 2023 kun sa diin mangin “main guest” ang mga miembro sang Armed Forces of the Philippines (AFP).
Sa report sang CNN Philippines, ang “Konsiyerto sa Palasyo” amo ang ideya ni Marcos, nga pagahiwaton sa nagkalain-lain nga bahin sang Malakanyang kun sa diin igapakita sang mga local artists ang ila world-class talent.
Suno pa sa PCO, igapakita sa konsierto ang bugana nga kultura sang Pilipinas paagi sang mga kanta, saot, rap, beatbox kag iban pa.
Tema sang aktibad amo ang “Awit ng Magiting” nga nagahatag sang pagkilala sa sakripisyo sang mga soldado agud mapabilin ang kalinungan kag seguridad sang pungsod.
Imbidato sa okasyon ang mga soldad kaupod ang ila pamilya sa Malakanyang para maglantaw sang konsierto.
Kalakip sa mga performer ang gikan sa Cebu, Ilocos Norte, Quezon, Cavite, Iloilo, Metro Manila, kag Davao.
Magadumala sa “KSP” ang Office of the President, PCO, Social Secretary’s Office kag Presidential Broadcast Staff – Radio Television Malacañang.*
