Nagapanawagan ang isa ka grupo sang mga nurses sang P50,000 nga starting salary sa ila nga trabaho sa tunga sang pagsaka sang presyo sang mga balaklon sa Pilipinas.
Sa report sang ABS-CBN, ginpahayag ni Filipino Nurses United (FNU) president Maristela Abenojar nga sadtong 2018 pa lang yara na sa P32,000 ang living wage para sa isa ka pamilya nga Pilipino nga may lima ka miembro, suno IBON Foundation.
Gin-ako naman ni Abenojar nga sakop ang mga nurse sang Salary Standardization Law nga nagapasaka sang sweldo sa mga empleyado sang gobyerno, kalakip na ang mga nurse nga naga-obra sa mga pampubliko nga ospital. Apang “tingi-tingi” ang paghatag sang umento sa sweldo sa idalom sang nasambit nga layi.
May ginsumiter naman nga hagna ang ACT Teachers party-list Rep. France Castro nga tuyo himuon P50,000 ang starting salary sang mga nurse.
Nagprotesta man ang FNU sa Taft Avenue agud manawagan nga ipasaka ang sweldo sang mga nurse.
Ginmanduan ni Presidente Ferdinand “Bongbong” Marcos Jr. ang Commission on Higher Education nga solusyunan ang kakulangan sa nurses.
Suno naman sa Department of Health, 350,000 ka mga nurses ang kinahanglanon karon sa bilog nga pungsod para masiguro ang nagakaigo nga nurse-to-patient ratio kag maayo nga pagtatap sa mga pasyente.
Apang suno kay Senate President Juan Miguel Zubiri, sweldo ang ginhalinan sang problema rason nga “taas-sahod” ang solusyon para mapunggan ang paghalin sang mga nurses sa pungsod.*
