Ginkompermar kagab-i sang City Health Office ang ika 19 nga kaso sang nagpositibo sa COVID19 sa ciudad sang Bacolod.
Ini ang 35-anyos nga lalaki nga isa ka LSI ukon Locally Stranded Individual nga halin sa Maynila kag nag-abot sang Mayo 26 sa ciudad upod ang iya sini nga utod kag amay kag ginderetso ang mga ini sa facility quarantine sang ciudad.
Sa exclusive nga interview sang Radyo Bandera Patrol Team kay Barangay Captain Dony Dela Vega sang Barangay Alijis kag sa duha ka miembro sang BHW sang Barangay nahibaloan nga wala magpabalo ang nasambitan nga pasiente kag ang iya sini nga pamilya nga ini ang lunsay halin sa Facility Quarantine sang ciudad kag ginahulat pa ang resulta sang swabtest.
Dismayado man si Barangay Captain Dela Vega sa katapo sang CHO kag IATF-Bacolod bangod sa kakulangan sang koordinasyon sa Barangay kag ginkakibot nalang nila ang pagpositibo sang pasiente.
Sa ginhiwat nga contract tracing sang Barangay nahibaloan nga nagbaton pa sang bisita ang pasiente sa ila balay kag nag-inom-inom upod ang iya sini nga barkada.
Dugang pa sang Barangay nga naghampang pa ini sang basketball sa gym antes paman mabal-an ang resulta.
Nahibaloan man nga matapos nga gindul-ong ini sila sang Bus halin sa quarantine nagsakay ang mga ini sa trisikad padulong sa ila nga puloy-an.
Sa karon ginlockdown na ang Purok Celita kon sa diin nagapuyo ang pasiente kag Purok Malipayon kon diin nagapauli ang trisilad driver, naka home quarantine sa karon ang pasiente kag pamilya sini kag nakatalana nga igahalin liwat sa facility quarantine.
Sa piyak nga bahin padayon ang contract tracing sang Barangay.
Nagapabilin naman nga asymtomatic ang pasiente kag wala sang balatian nga ginasupehar.
Sa interview naman sang Radyo Bandera Team kay Dr. Grace Tan spokesperson sang IATF-Bacolod iya sini ginpahayag nga negatibo na ang nga upod sang pasiente halin sa Maynila.
Nagpanawagan ang Kapitan sang Barangay nga indi magpanic kag magkooperar sa ila mga protocol nga igapatuman agid mangin hilway ang tanan sa nasambitan nga balatian.
