Nagdangat sa apat ka balay ang totally damaged samtang apat naman ang partially damages sa nagluntad nga sunog sa Cinco de Noviembre Street, Purok Ilimnan, Barangay III, siudad sang Silay, pasado las 10 sang aga subong nga Miyerkules, Oktubre 25, 2023.
Suno sa Kapitan sang Barangay III nga si Henry Domin Jr. nga naglawig lamang sang 15 ka minutos ang sunog bangud madasig nga nagresponde sang mga katapo sang Bureau of Fire Protection (BFP) – Silay City sa ginluntaran sang insidente.
Dugang pa ni Domin, base sa pahayag sang mga residente nga isa ka katol nga ginpabay-an ang gintunaan sang sunog.
Suno pa kay Domin nga himo sa “light materials” ang balay rason nga madasig lamang maglapta ang sunog.
Pahayag pa ni Domin nga apat ka pamilya ang tuman nga na-apektuhan kag ila ini temporaryo nga igabutang sa Barangay Hall.
May ginpreparar naman ang barangay sang mga food packs para sa mga apektado sang sunog kag magapatawag naman si Domin sang pagsinapol kaupod ang iya council para sa dugang pa nga bulig.
Nagapasalamat naman ang kapitan sa mga residente kag BFP-Silay City nga nagbuliganay agud matapna ang sunog kag sa Red Cross nga handa maghatag sang ila nga serbisyo sa anuman nga kalamidad kag aksidente nga magluntad sa siudad.
Maswerte naman nga wala sang may napatay ukon nasamaran sa nagluntad nga sunog.*
