Ginapahanumdom sang Commission on Elections (Comelec) sa tanan nga mga kandidato nga mangin “sports” sa kampanya kag batunon ang mangin resulta sang piniliay bangud ang tingog sang pumuluyo ang tingog man sang Ginuo.
Natalana sa Oktobre 28 ang katapusan nga adlaw sang kampanya sang mga kandidato sa Barangay kag Sangguniang Kabataan Elections (BSKE) kag sa Oktobre 30 naman ang piniliay nga maga-umpisa las 6 sang aga kag magatakop las 3 sang hapon para masugdan ang pag-tally sang boto.
Suno pa kay Provincial Election Supervisor Atty. Ian Lee Ananoria nga pwede pangitaon sang mga botante ang ila presinto sa precinct finder nga makita sa website sang Comelec agud mangin mahapos sa ila ang pagboto sa maabot nga Lunes.
Matapos ang pagboto, ginapahanumdom man sang Comelec nga magwa gilayon sa polling Center agud ang iban nga wala pa makaboto ang mahatagan sang lugar kag mangin madasig man ang ila proseso sa pagboto.
Hugot man karon nga ginatutukan sang Comelec pinaagi sa “Task Force Kontra Bigay ang pagpamakal sang boto bangud nangin madugay na ini nga issue sang pila ka mga nagkalapierdi nga kandidato sa eleksyon.
Ang madakpan nga nagabakal sang boto ang may nagakaigo nga silot ukon pagasakaan sang nagakaigo nga kaso.*
