Ginkumpirmar sang San Carlos City PNP nga isa ka Street Level Individual (SLI) ang isa ka lalaki nga ginluthang sa San Juan Bonifacio, Barangay 5, San Carlos City, Negros Occidental kahapon nga adlaw sang Martes, Oktubre 24.
Ginkilala ang biktima kay Welmar Pamilar alyas “Bebeboy” nga residente sang nasambit nga siudad.
Suno sa imbestigador sang San Carlos City PNP, nga nagwa sa ila imbestigasyon nga nagagamit kag nagaduso sang iligal nga druga si Pamilar kag ginakabig ini nga SLI.
Madumduman nga ginluthang sang suspek sang lima ka beses si Pamilar rason nga natumba ini sa duta.
Ginpalapitan sang suspek kag ginluthang pa sa ulo si Pamilar apang nakalikaw ini kag nakaangkon lang sang gamay nga pilas sa agtang.
Suno pa sa saksi nga matapos magpalagyo ang suspek, nagtindog pa si Pamilar apang natumba ini gilayon bangud sa iya mga naangkon pa nga igo sang bala sa paa.
Dugang pa diri may naglabay nga isa ka babayi kag na-igo sang duha ka bala ang iya paa.
Suno pa sa kapulisan nga ginahibalo pa nila ang motibo kag ang identity sang suspek sa pagpangluthang sa biktima.
Sa karon, padayon nga ginabulong sa San Carlos City Hospital ang biktima.*
