Handa na ang Commission on Elections (Comelec) sa patigayunon nga Barangay kag Sangguniang Kabataan Elections sa Lunes, Oktubre 30, 2023.
Suno kay Provincial Election Supervisor Atty. Ian Lee Ananoria, handa naman ang kapin 16,000 ka mga manunudlo nga magaserbe sa eleksyon bilang board of canvassers sa nagkalain-lain nga barangay sa Negros Occidental.
Dugang pa ni Ananoria nga nag-inabot na ang mga balota kag election paraphernalia sa probinsya sini lamang nga semana.
Pahayag pa ni Ananoria nga gina-tsekyar na sang ahensya ang mga kulang nga balota apang sarang naman ini solusyunan bangud may yara sila sang balota nga kalakip sang ila contingency supplies.
Bangud diri, 100% na nga handa ang Comelec sa pagpatigayon sang BSKE Election sa probinsya.
Ginpahanumduman naman ni Ananoria ang tanan nga mga kandidato nga mangin “sports” sa kampanya kag batunon ang mangin resulta sang piniliay bangud ang tingog sang pumuluyo amo ang tingog man sang Ginuo.
Natalana sa Oktubre 28 ang katapusan nga adlaw sang kampanya sang mga kandidato sa Barangay kag Sangguniang Kabataan Elections (BSKE).
Sa Oktubre 30 naman ang piniliay nga maga-umpisa las 6 sang aga kag magatakop las 3 sang hapon para masugdan ang pag-tally sang boto.*
