Ginbawian sang kabuhi ang isa ka laborer matapos ini ginluthang sang wala pa makilal-an nga suspek sa Sitio Minauyahan, Barangay Minautok, banwa sang Calatrava, Negros Occidental, takna las 7:30 sang gab-i, Miyekules, Oktubre 25, 2023.
Ginkilala ang biktima kay Randy Barba alyas Boyet, ligal ang pang-edaron, wala sang asawa, laborer kag residente sang High School Side, Poblacion 2 sa siudad sang Sagay.
Base sa inisyal nga imbestigasyon sang Calatrava Municipal Police Station, samtang nagalakat ang biktima sa higad sang karsada sa nasambit nga lugar, hinali na lamang ini ginluthang sang makapila nga beses sang wala pa makilal-an nga suspek.
Nakaangkon sang madamo nga igo sang bala sa lawas ang biktima nga gintunaan sang iya gilayon nga kamatayon.
Nagpalagyo naman ang suspek matapos ang kremin.
Padayon sa gihapon ang imbestigasyon sang Calatrava MPS agud mahibaluan ang identity sang suspek kag ang motibo sa pagpangluthang.*
