HIMAMAYLAN CITY – Apat sa 20 ka gina-alegar mga katapo sang New People’s Army (NPA) ang napatay sa nagluntad nga mga engkwentro sa Brgy. Carabalan sa siudad sang Himamaylan, Miyerkules sang aga, Marso 1.
Base sa report sang 303rd Infantry Brigade (IB), naglawig ang una nga engkwentro sang 20 ka minutos kun diin tatlo ka gina-alegar mga rebelde ang napatay.
Duha pa engkwentro ang nagsunod kun diin isa pa sa bahin sang gina-alegar NPA ang nagtaliwan.
Samtang pilason naman ang duha ka mga soldado sang 94th Infantry Battalion kun diin isa ang nakabaton sang Wounded Personnel Medal halin kay 303rd IB Commander Col. Orlando Edralin.
Suno kay Col. Edralin, duha lamang ang posible nga dangatan sang mga nagapadayon sa hublag: ang magsungka sa mga awtoridad ukon ang mapatay sa engkwentro.
Madamo nga mga armas kag kagamitan ang nakumpiskar halin sa gina-alegar rebelde nga grupo nga nalakipan sang mataas nga kalibre sang mga rifle kag iban pa nga armas-luthang, granada, radyo, compass, bulong, pagkaon, kag subersibo nga mga dokumento.
“Come down, bring your arms and avail of the Government’s Enhanced Comprehensive Local Integration Program (E-CLIP) for you to start a new and productive life,” panawagan ni Col. Edralin sa mga rebelde.
