BAGO CITY – Patay ang isa ka 22-anyos nga lalaki matapos ginbuno sang iya tiyo sa nagluntad nga kinagamo sa Purok Kasantulan, Brgy. Mailum, siudad sang Bago takna las dyis sang gab-i sang Miyerkules, Marso 1.
Suno kay PMSg. Mars Anthony Luto, duty investigator sang insidente, naga-inom sang makahulubog nga ilimnon ang maghimata bilang pagsaulog sang kaadlawan.
Apang may nagluntad nga kinagamo sa tunga sang biktima nga si John Michael Cornelio, 22-anyos nga residente sa nasambit nga lugar, kag iban pa nga mga bisita.
Gina-alegar nga ginsumbag pa sang biktima ang iban sini nga mga himata.
Nabugtawan naman ang nagakatulog sa bangko nga tiyo nga si Domy Pasigado, 56-anyos nga drayber kag residente man sang nasambit nga lugar, kag nasumbagan man ini ni Cornelio.
Ginkuha sang tiyo ang iya nga ‘buckle knife’ kag ginbuno si Cornelio sang makatatlo ka beses.
Nakaangkon ang biktima sang duha ka mga buno sa dughan kag isa malapit sa tiyan.
Gilayon nga gindala ang biktima sa Bago City Hospital apang ginbawian ini sang kabuhi.
Nakahunong naman ang tiyo sa Bago City Police Station kag nagapang-atubang ini sang kaso nga ‘homicide.’
