Ginkakibot sang duha ka mananagat sang makita nila ang bahin sang lawas sang tawo, kalakip na ang bukton nga may tattoo sa sulod sang tiyan sang bagis nga ila nadakpan sa Argentina.
Sandig sa report sang Agence France-Presse, ginasiling nga bangud sa pagkadakop sa bagis, nasabat na ang misteryo angut sa isa ka lalaki nga 10 na ka adlaw nga na-missing.
Suno sa mga otoridad, ulihi nga nakita nga buhi sadtong Pebrero 18 si Diego Barria, 32-anyos, isa ka oil industry employee nga nagagamit sang quad bike (ATV) agud maglibot-libot sa baybayon sa nasambit nga lugar.
Suno pa sa mga otoridad posible nga nakabunggo sa bato si Barria kag gin-anod sang balod ang iya lawas.
Sang buksan sang mananagat ang tiyan sang nadakpan nga bagis, nakita nila ang bahin sang “skin, fat and human flesh.”
Kalakip sa nakita sa tiyan sang bagis ang butkon nga may tattoo sang rose nga may pangalan nga ‘Josefina’, nga amo man ang tattoo ni Barria.
Mga “School” sharks ang nadakpan sang duha ka mananagat nga may kadakuon nga lima ka tapak.
Suno naman kay Daniela Millatruz, tigpamuno sang local missing person’s division nga nagabulig ang navy sa pagpangita pa sa iban nga bahin sang lawas ni Barria.*
