Gina-alegar nga ginahabuyan sang basura sang mga residente sang Barangay Cabug ang bag-o nga dalan sa Bacolod – Murcia Economic Highway.
Sang ginpadulungan ini sang Radyo Bandera news team, didto na nakit-an ang tumpok sang mga basura nga ginalangaw, gina-ulod kag nagapanimaho na.
Makit-an man ang mga gamit nga diapers kag mga patay nga sapat sa lugar.
Sa interview sang Radyo Bandera sa mga concerned citizens, ila ginpahayag nga ang mga basura ang nagahalin sa mga pumuluyo sa Deca Homes nga wala na makapaabot sa mga naga-pickup sang mga basura.
Dugang pa diri nga gina-alegar nga ginasugo nila ang mga tricycle drivers nga ihaboy ang mga basura sa kilid sang nasambit nga dalan.
Ginatinguhaan pa sang Radyo Bandera nga makuhaan sang pahayag ang Homeowners Association sang Deca Homes kag lokal nga panguluhan sang Barangay Cabug.*
