Nagapanimaho kag nagakaagnas na sang masapwan ang bangkay sang isa ka lalaki sa tunga sang talamnan sa Sitio Paho, Barangay Batuan, banwa sang San Enrique, Negros Occidental, takna las 10:57 sang aga, Martes, Setyembre 19, 2023.
Ginkilala ang biktima kay Armando Bedaure y Gelarso, 66-anyos, kasado, kag residente sang Sitio Quia, Barangay Alijis, banwa sang Valladolid.
Sa interview sang Radyo Bandera kay Police Major Leo G. Estopa, hepe sang San Enrique Municipal Police Station, nakit-an sang mga mangunguma nga nagapanapas sang humay ang nagahapa nga bangkay ni Bedaure nga nagakaagnas kag nagapanimaho na.
Suno pa kay PMaj. Estopa, gilayon ini nga ginreport sang mga mangunguma sa mga kapulisan kag gilayon naman nga nagresponde ang San Enrique PNP sa ginluntaran sang insidente.
Nahibaluan nga may nareport nga na-missing nga persona sa banwa sang Valladolid kag tubtob subong wala pa ini nakit-an.
Dugang pa ni PMaj. Estopa nga gilayon nagpadulong ang anak sang nareport nga missing nga persona nga si Analiza Bedaure y Genire, 34-anyos, agud tsekyaron ang bangkay.
Positibo naman nga ginkumpirmar ni Analiza nga ang nasapwan nga bangkay amo ang iya na-missing nga amay bangud suksok pa sini ang iya bayo, singsing, kag bracelet.
Pahayag pa ni PMaj. Estopa nga ginreport nga namissing ang biktima sadtong Agosto 27, 2023 sang nakaguwa ini sa ila balay sa banwa sang Valladolid kag wala na nakapauli tubtob subong.
Base sa pahayag sang pamilya sang biktima, nagasupreher sa Alzheimer’s disease ang ila amay rason nga malipaton na ini
Gindala na karon ang bangkay sa Jondonero Funeral Parlor, banwa sang Valladolid nga nakatalan ipaidalom sa autopsy examination agud mahibaluan kun ano ang gintunaan sang iya nga kamatayon.*
