Positibo nga ginkilala sang mga himata ang bangkay nga nasapwan sa Hacienda Otilla, Barangay Efigenio Lizares, siudad sang Talisay sadtong tinalikdan nga Biyernes, Setyembre 15, 2023.
Sa interview sang Radyo Bandera kay Maryjane Fegediro, bayaw sang biktima, ang bangkay ang ginkilala kay Richard Fegediro alyas ‘Erick’, 57-anyos kag residente sang Zone 4, Barangay Payao, banwa sang Binalbagan, Negros Occidental.
Suno kay Maryjane, subang sa tatlo ka mag-ulutod si Erick kag wala na ini sang mga ginikanan.
Pahayag ni Maryjane nga isa ka empleyado sang Local Government Unit (LGU) sa banwa sang Binalbagan, masami niya nga ginarespondehan ang iya bayaw sa tion nga may nagapanawag sa ila bangud masami ini may nagakaguba nga bagay kag kinahanglan nga bayran.
Pagklaro ni Maryjane, sumugod tuig 2004 nagasupreher na sa depression ang iya bayaw rason nga kun kis-a indi tadlong ang paminsaron sini.
Dugang pa ni Maryjane, makapila naman ka beses nga ginpabulong nila ang iya bayaw apang nagabalik sa gihapon ang balatian sini kag mas nagalala pa bangud kun sa diin na lamang ini nagakadto kag pila ka adlaw nga wala nagakaon.
Nagapati naman si Maryjane, nga posible nasal-an lamang ini nga malain nga tawo bangud nagapanghilabot ini sang gamit kasubong sang bayo nga hinalay apang wala naman ini nagapanakit.
Suno pa kay Maryjane, ulihi nila nga nakita ang iya bayaw sadtong tinalikdan nga Martes, Setyembre 12.
Gindugang pa sini nga kun sa Binalbagan kag Himamaylan lamang ini nagkadto, wala sang may masakit sa iya bayaw bangud madamo ang nakakilala sa iya diri.
Sa karon, ginaproseso na ni Maryjane ang death certificate sang biktima sa City Health Office sang Talisay agud magawad na ang bangkay kag mahatagan sang disente nga lubong.
Ginakuha pa karon sang Radyo Bandera sang opisyal nga pahayag Talisay City Police Station angut sa nasambit nga insidente.
