Nasapwan nga nagabarikutot ang bangkay sang isa ka babaye sa kilid dalan nga nakasoksok sang spaghetti nga itom sa ibabaw, lip-ot nga short nga itom man sa idalom, may cross pendant sa li-og kag may bracelet.
Ang bangkay nakit-an sang isa ka miyembro sang POSO nga naga roving mga las 5:00 sini nga aga sa Purok Progreso, Barangay Alijis sa atubangan sang Emilia J. Garcia Elementary School.
Base man sa pagpangusisa sang kapulisan, may nakita nga skidmark malapit sa ginbilinan sa biktima nga ginapatihan agi sang salakyan.
Nagapanawagan naman si Police Captain Elmer Bonilla sa nadulaan sang himata nga mag kadto lang sa Police Station 7 sa posible pagkilala sa biktima.
Ang bangkay sang babaye yara sa Villanueva Funeral sa Barangay Mansilingan kag nakatalana ipaidalom sa Post Mortem Examination.
Padayon pa karon ang imbestigasyon sang kapulisan angot sa identity sang biktima.
