BACOLOD CITY– Gin-kumpirmar ni Police Major Elmer Bonilla, hepe sang Police Station 7 ang pahayag ni Punong Barangay Deogracias “Donny” Dela Vega nga ang Barangay Alijis ang may pinakamanubo nga crime rate sa tatlo ka mga barangay nga yara sa idalom sang PS7.
Ang mga barangay nga nasakupan sang Area of Responsibility (AOR) sang PS7 ang ginalakipan sang Barangay Alijis, Vista Alegre kag Mansilingan.
Suno kay PMaj. Bonilla, sandig sa record sang iya talatapan humalin Enero 1, 2022 tubtob Pebrero 7 subong nga tuig ang Barangay Alijis ang may kabilugan nga 37 ka kremin, 59 ang narekord sa Barangay Mansilingan samtang 37 man ka kaso ang na-record sa Barangay Vista Alegre.
Apang ginklaro ni PMaj. Bonilla nga bisan kun lunsay may yara sang tig-37 nga system generated nga kaso ang Barangay Alijis kag Barangay Vista Alegre mas manubo sa gihapon ang Barangay Alijis bangud may mga kaso sa Barangay Vista Alegre nga referable lamang sa barangay kag wala na ginapa-record sa kapulisan.
Samtang sa interview sang Radyo Bandera kay Kap. Dela Vega sang Barangay Alijis, iya ginpahayag nga humalin sang iya pagpungko sa pwesto sadtong tuig 2018 nag-nubo na ang kremin sa iya barangay kag ang sitwasyon sang peace and order nagtin-ad.
Dugang pa ni Dela Vega agud ma-maintain pa gid ang peace and order nga sitwasyon sa barangay sa bulig ni PMaj. Bonilla kag pinaagi sa gin-donar nga lote sang Purok ECC sa ECC Subdivision magapatindog ang barangay sang detachment sang Bacolod City Mobile Force Company nga sarang ma-istaran sang 80 ka mga personnel.*
