Ginpahayag sang choreographer sang Barangay Granada nga tatlo ka bulan nagpreparar ang ila nga grupo para sa Masskara Festival 2023 and Street Dance Competition.
Suno sa choreographer sang Barangay Granada nga si Jodem Casabuena nga sa sulod sang tatlo ka bulan nga preparasyon, halos adlaw-adlaw sila nga naga-practice agud mas mangin perpekto ang ila nga dance steps.
Dugang pa ni Casabuena nga may 60 ka bilog sila nga dancers kun sa diin 16 diri ang babayi kag 44 ka mga lalaki. Ang pinakahubin diri ang naga-edad 16-anyos samtang ang pinakatigulang naman ang naga-edad 29-anyos.
Pahayag pa sini nga nagdangat naman sa 200 ang ila props men nga nagahimo sang ila nga mga costumes kag props kun sa diin naglab-ot sa duha nga bulan antes mahuman ang ila mga costumes kag props.
Suno naman kay Casabuena nga may yara sang medical assistant ang kada isa sang ila nga dancers agud magbulig sa mga ini kun maglain ang ila pamatyag kag kun magguba ang ila mga costumes kag props.
Ginpaathag naman ni Casabuena nga disiplina, pag-inchindihanay kag pagpalangga ang sekreto para mangin mabakod ang ila relasyon sa isa kag isa kag mangin madinalag-on ang ila nga pagpangabudlay sa nasambit nga kompetisyon.
Madumduman nga back-to-back champion ang Barangay Granada sa ika-44 nga MassKara Festival Streetdance and Arena Competition sa siudad sang Bacolod nga ginpatigayon sang Domingo sang gab-i, Oktubre 22, 2023.
Nagbaton ang Barangay Granada sang P1 Million nga cash prize. Ini ang ikaduha na nga tion nga nakabaton sang P1 Million nga cash prize ang Granada, una nga beses amo sadtong tinalikdan nga tuig.
Nagligad nga tuig 2022, ginpierde sang Granada ang 16 ka iban pa nga mga contingents. Subong nga tuig, ila man ginlutos ang 10 ka mga pili nga barangays sa tuigan nga kompetisyon.*
