Ginbawian sang kabuhi ang isa ka Philippine National Police (PNP) peronnel matapos sini mabungguan ang Mitsubishi Canter sa National Highway, Purok Ipil-ipil, Barangay San Juan, banwa sang Pontevedra, Negros Occidental, takna las 2:15 sang kaagahon, Lunes, Oktubre 23, 2023.
Ginkilala ang driver sang Yamaha Sniper kay Reden Agus y Ronquillo, 31-anyos, PNP personnel kag residente sang Sitio Panique, Brgy. Hilamonan, siudad sang Kabankalan.
Samtang, ginkilala naman ang driver sang Mitsubishi Canter kay Sony Elet y Simpas, 46-anyos, kasado kag residente sang Brgy Inayawan, banwa sang Cauayan.
Suno kay Police Major Romulo Gepilango, hepe sang Pontevedra Municipal Police Station, na-augment si Agus sa MassKara Festival sa Bacolod kag nagapauli ini sa siudad sang Kabankalan kaina sang kaagahon.
Dugang pa ni Gepilango nga natulugan si Agus samtang nagamaneho sang motorsiklo rason nga nagkadto ini sa pihak nga linya kag nabungguan ang Mitsubishi Canter nga ginamaneho ni Elet nga nagabiyahe gikan sa Kabankalan padulong sa Bacolod.
Nakaangkon sang madamo nga pilas sa lawas si Agus rason nga gindala sa Valladolid Hospital agud mahatagan sang medikal nga atensyon, apang gindeklarar ini nga dead on arrival sang attending physician.
Gindala naman ang sa kustodiya sang Pontevedra MPS ang duha ka imboldado nga salakyan para sa nagakaigo nga disposisyon.*
