Ginpahayag ni OWWA OIC Regional Director, Rizza Joy Moldes nga pagahatagan nila sang Heroes Welcome si Loreta Alacre bilang pagkilala sa iya nga pagsakripisyo bilang isa ka OFW sa Israel base man sa mandu ni Pangulong Bongbong Marcos Jr.
Suno kay Moldes nga magluwas sa heroes welcome, magahatag man sila sang bulig pinansyal para sa paghaya kag paglubong sa bangkay ni Loreta kag scholarship kag livelihood program para sa pamilya Alacre.
Madumduman nga nag-abot sa Negros Occidental ang bangkay ni Loreta gikan sa pungsod Israel kahapon nga adlaw sang Domingo, Oktubre 22.
Gindala naman sa Beniabon’s Funeral Homes sa siudad sang Cadiz ang bangkay ni Loreta agud balsamaron kahapon nga adlaw.
Pagalauman nga maga-abot ang bangkay ni Loreta sa ila balay subong nga adlaw sang Lunes, Oktubre 23 kag igalubong naman ini sa Nobyembre 5, 2023.
Paglaragway sang pamilya Alacre nga isa ka mabuot kag mapisan nga utod si Loreta nga 16 ka tuig na nga nagatrabaho sa Israel bilang isa ka caregiver.
Si Loreta ang makabig man nga haligi sang puluy-an bangud indi lang sa iya mga utod ini nagasuporta kundi nagapa-eskwela pa gid sa iya nga kahinablosan.
Napatay si Loreta sa Israel bangud sa nagaluntad nga giyera sa tunga sang Israel kag Hamas militant nga nagsugod sadtong Oktubre 7, 2023.*
