Ginpahayag ni Ma Fe Trespeuntes, tigpamuno sang Department of Public Services Bacolod (DPS) nga nagdamo ang basura nga ila nakolekta sa MassKara Festival sini nga tuig 2023.
Suno pa kay Trespeuntes nga 24/7 sila nga naga-obra agud mag-monitor kag manlimpyo sang basura sa siudad sang Bacolod kag naga-deploy silal sang ila mga street sweeper takna las 3 sang kaagahon.
Dugang pa ni Trespeuntes, bangud sa kadamo sang tawo nga naglagaw, nagdamo man ang basura sa siudad ilabi na sa mga festival sites nalakip na ang Bacolod City Plaza, Bacolod City Government Center, North Capitol Road kag Upper East.
Pahayag pa sini nga indi buot silingon nga Masskara Festival, mga festival sites lang ang ila gintutukan bangud ginamonitor kag ginakuha sa gihapon sang IPM ang mga basura sa mga subdivision kag barangay sa siudad.
Bangud diri, nag-alokar ang DPS sang siudad sang duha ka salakyan nga nagpatigayon sang remapping activity kun sa diin liwat nga nagapanglibot ang truck sang DPS sa mga nalabyan na sang IPM agud masiguro nga wala na sang basura nga may nabilin.
Suno pa sa iya nga 50 ka miembro sang Clean and Green Team sang Strikers ang gin-assign nila para manilhig, manghakwat sang basura kag magbulig nga maninlo sa mga festival sites.
May yara man sang ginabulubanta 500 ka mga sweepers sa siudad sang Bacolod.*
