SOUTH AFRICA– Maisog nga batasan ang ginpakita sang South African pilot matapos nagpatigayon ini sang emergency landing bangud may cape cobra ang nagkamang sa iya bangko samtang nagabiyahe sa adlaw sang Biyernes Santo, Abril 7, 2023.
Ginkilala ang piloto kay Rudolf Frasmus nga nagapalupad sang pribado nga aircraft nga may apat ka pasahero halin Bloemfontein pakadto Pretoria.
Gilayon gintipon ni Frasmus ang tanan niya nga kaisog kag naka-landing sila sang mahilway sa siudad sang Welkom.
“I wish to congratulate Rudolf for the courageous steps taken and for how he handled what could have been a major aviation incident,” suno kay South African Civil Aviation Authority Director Poppy Khoza.
Suno naman kay Frasmus, abi lamang niya, isa ka water bottle ang yara sa likod apang ulihi na niya natalupangdan nga man-og gali.
Makita ang cape cobra sa Southwestern South Africa kag ini nga man-og ang makamamatay.