Nag-propose na ang international singer nga si Charlie Puth sa nobya sini nga si Brooke Sansone.
Gin-share ni Charlie ang ila engagement sa social media paagi sa pag-post sang litrato nila ni Brooke nga naga-uyat sang wine glass pati na ang close up shot sang singsing ni Brooke.
“I flew to New York to ask my best friend to marry me, and she said yes. I am the happiest, best version of myself and it is all because of you Brookie. I love you endlessly forever and ever and ever,” suno sa post ni Charlie.
Nahibaluan nga nangin opisyal nga magkahagugma sanday Charlie kag Brooke sadtong Disyembre 2022.
Isa ka digital marketing kag PR coordinator si Brooke.
Kilala naman si Charlie sa iya mga hit songs nga “See You Again” upod si Wiz Khalifa para sa movie nga “Fast & Furious.”
Naka-collaborate man ni Charlie si Jungkook, ang miyembro sang sikat nga boyband nga BTS, para sa iya single nga “Left and Right.”
Pila pa sa mga sikat nga kanta ni Charlie amo ang “We Don’t Talk Anymore (feat. Selena Gomez)”, “Attention” kag “Light Switch”.*
