(NOTE: Hungod nga wala ginhingadlan ang mga imbolbado agud maamligan ang menor-de-edad nga kabataan kag bangud sensitibo ini nga balita.)
EXCLUSIVE: Nagpalapit sa Radyo Bandera Sweet FM Bacolod ang iloy sa viral video (Video | Facebook) kun diin makita nga ginakuha sini ang iya bata nga nagahilibion kag nagahakos sa lolo.
Ginapamatukan ni alyas Bea, 29-anyos nga iloy sang duha ka mga bata kag residente sang Brgy. Bacong sa siudad sang Bago, ang mga komento nga ginbilin kag ginpabay-an sini ang kabataan sa iya mga ugangan.
Suno kay alyas Bea, madugay na nga yara sa iya puder ang mga bata nga naga-edad sang duha kag anum ka tuig (ang bata sa video), apang gintugutan niya ang mga ini nga magkadto sa haya sang ila amay sa banwa sang Murcia sang tinalikdan nga Agosto bilang konsiderasyon.
Base sa panaysayon ni alyas Bea, wala sang trabaho, wala nagasustento, kag nagapanakit pa ang anay partner sini (indi kasado) nga nangin rason sang ila pagbulagay.
Nagatrabaho anay bilang overseas Filipino worker (OFW) sa Saudi si alyas Bea sang 2021.
“Naglakat ko Saudi then nagapadala ko sa iya 1st to 2nd month (June kag July) P17K. Tapos pagka 3rd month, wala niya gin-claim kay ang mga bata ginpadala niya sa mga ugangan ko sa Ma-ao sa pangayawan sa kampo,” pahayag ni alyas Bea.
Amo adto ang pinakauna nga tion nga nangin imbolbado ang Department of Social Welfare and Development (DSWD) kag nagpirmahanay nga masustento ang amay sa kabataan.
Sumugod sadto, sa mga ginikanan na ni Bea sa Ma-ao nagatiner ang kabataan.
Apang suno kay alyas Bea, wala makahatag ang amay kag wala man ini makapakita sa kabataan kag ang mga ugangan lamang ang nagabisita sa kabataan nga nagatiner sa mga ginikanan ni Bea tubtob nakabalik ini sa Pilipinas.
Dugang pa ni alyas Bea, nagapadala ini kada bulan para sa mga galastuhan kag pang-eskwela sang kabataan.
Depensa ni alyas Bea angut sa viral video nga nagluntad sang Setyembre 4, 2023, nahadlok lamang ang bata bangud nga madamo sang tawo kag posible nga ginpaminsar sang bata nga ibilin ini sa DSWD.
Samtang gina-aku ni alyas Bea nga naga-inom ini sang nakapauli ini.
“Aku ko na nga naga-inom ko pagpuli ko kay tungod sang ginpanghambal niya sa akon nga indi niya ko kinahanglan sa kabuhi niya kag indi na ko magpakita sa iya,” pabutyag sini.
Apang nagapasalig si alyas Bea nga maayo ang kahimtangan kag malipayon subong ang kabataan sa iya puder.
Dugang pa sini, nagabulig man sa pagsagod sa kabaataan ang iya live-in partner nga panday kag nagatrabaho man sa kampo.
Nagabulig man ini sa pagtudlo sa mga assignment sang mga bata. Samtang manugbalik naman sa abroad si alyas Bea.
Nagapasalig man si alyas Bea nga magapadayon ini sa pagpaninguha para sa mga bata kag sa ila pag-eskwela.
“Ginalaygayan ko na ang bata nga sa akon lang siya anay maeskwela kay magdako siya pwede na siya makakadto sa Murcia. Indi ko siya pagpunggan,” dugang pa sang iloy.
Nagpadala man sang mga video sa Radyo Bandera Bacolod si alyas Bea kun diin makita nga nagakinadlaw kag naga-bonding sila sang mga bata.
