Nagahiligdaon kag nagapaligo na sa kaugalingon nga dugo ang isa ka construction worker sang maabtan ini sang mga otoridad sa sulod sang iya balay sa Brgy. Maloco, Ibajay, Aklan, Miyerkules sang aga, Setyembre 20, 2023.
Base sa inisyal nga impormasyon sang mga otoridad, ginlabo-labo sang wala pa makilal-an nga suspek ang biktima nga si Benedic Garzon, 37-anyos na residente sang probinsya sang Leyte kag temporaryo nga naga-istar sa Brgy. Maloco sa nasambit nga banwa.
Nahibaluan nga antes ang insidente, nag-inom-inom pa ang biktima kaupod ang bana sang ila tagaluto sa gina-obrahan nga construction site sa mismo nga lugar.
Pagka-aga, nagtingala ang tagaluto nga wala pa nagkasulod si Garzon sa ila ulubrahan rason nga ginkadtuan niya ini sa iya balay.
Didto na nadiskubrehan ang bangkay sang biktima kun sa diin nakaangkon ini sang 35 ka mga labo sa nagkalain-lain nga bahin sang iya lawas, nga gintunaan sang iya gilayon nga kamatayon.
Samtang, padayon pa ang ginahimo nga imbestigasyon sang Ibajay PNP sa nasambit nga kremin agud matumod kun sin-o ang suspek kag ano ang motibo sini sa pagpatay kay Garzon.*
