Magahimo si Councilor Al Espino sang komitiba nga maga-imbestigar sa gina-alegar nga korapsyon nga nagakatabo sa Bacolod Traffic Authority Office (BTAO) subong nga Huwebes, Oktubre 26, 2023.
Suno kay Espino, ginhimo niya ini bangud nakita niya mismo ang korapsyon nga nagakatabo sa sulod sang BTAO.
Dugang pa ni Espino nga isa sa mga korapsyon nga iya nakita amo ang padayon sa gihapon nga nagabaton ang BTAO personnel sang bayad sa mga na-impound nga salakyan apisar nga cut-off na.
Pahayag pa ni Espino nga iya nahibaluan nga ang BTAO Building Administrator nga si Abner Salvallon amo ang himata sang asawa ni Police Major Junjie Liba, tigpamuno sang BTAO.
Apang, ginpanginwala kag gintawag nga fake news ni Liba ang alegasyon ni Espino nga nagabaton sila sa gihapon sang bayad apisar nga cut-off na.
Pahayag pa ni Espino nga kun mapamatud-an nga may nagakatabo nga korapsyon sa sulod sang BTAO, pagasakaan niya sang kaso si Liba.*
